Caricamento...
di Sant'Alfonso Maria de' Liguori
Quanno nascette Ninno di Sant'Alfonso Maria de' Liguori: «Quanno nascette Ninno, quanno nascette Ninno a Betlemme» — testo e accordi.
Quanno nascette Ninno,
quanno nascette Ninno a Betlemme,
Era notte e pareva miezzo juorno.
Maje le stelle lustre e belle
se veretteno accussì,
E a cchiù lucente
jette a chiammà li Maggie all’Uriente
Maje le stelle lustre e belle
se veretteno accussì,
se verettene accussì
De presso se scetaine,
de presso se scetaine l’aucielle
Cantanno de na forma tutta nova
Pe’nsi a grille co’li strilli
e zumpanno accà e allà,
E’ nato, è nato
dicevano lu Dio che ci ha criato.
Pe’nsi a grille co’li strilli
e zumpanno accà e allà,
e zumpanno accà e allà.
Cu tutto ch’era vierno,
cu tutto ch’era vierno, ninno bello
Pascettero a migliara
rose e sciure.
Pensì o fieno sicco e tuosto
che fuje puosto sotto a te
S’enfigliulette
e d’e frunnelle e sciure se vestette.
Pensì o fieno sicco e tuosto
che fuje puosto sotto a te,
che fuje puosto sotto a te.
A no paese che
A no paese che se chiamma Ngadde,
Sciurettero le bigne e ascette ll'uva.
Ninno mio sapuritiello,
Rappusciello - d'uva - sì Tu;
Ca tutt'amore
Faje doce a vocca, e po 'mbriache o core.
Ninno mio sapuritiello,
Rappusciello - d'uva - sì Tu;
Rappusciello - d'uva - sì Tu;
No 'nc'erano nemmice
No 'nc'erano nemmice pe la terra,
La pecora pasceva cu 'o lione;
Cu 'o capretto - se vedette
'O liupardo pazzeà;
Ll'urzo e 'o vitiello
E co lo lupo 'n pace 'o pecoriello.
Cu 'o capretto - se vedette
'O liupardo pazzeà.
'O liupardo pazzeà.
S'arrevotaje 'nsomma
S'arrevotaje 'nsomma tutt'o Munno,
Lu cielo, 'a terra, 'o mare, e tutt'i gente.
Chi dormeva - se senteva
'N pietto 'o core pazzeà
Pe la priezza;
E se sonnava pace e contentezza.
Chi dormeva - se senteva
'N pietto 'o core pazzeà
'N pietto 'o core pazzeà
Guardavano le pecore
Guardavano le pecore 'i Pasturi,
E n'Angelo sbrannente chiù dô sole
Comparette - e lle dicette:
No ve spaventate no;
Contento e riso
La terra è arreventata Paraviso.
Comparette - e lle dicette:
No ve spaventate no;
No ve spaventate no;
A vuie è nato ogge
A vuie è nato ogge a Bettalemme
Dô Munno ll'aspettato Sarvatore.
Dinto 'i panni 'o trovarrite,
Nu potite maje sgarrà,
Arravugliato,
E dinto a lo Presebbio curcato.
Dinto 'i panni 'o trovarrite,
Nu potite maje sgarrà,
Nu potite maje sgarrà,
A meliune ll'Angiule
A meliune ll'Angiule calate
Co chiste se mettetteno a cantare:
Gloria a Dio, pace 'n terra,
Nu chiù guerra - è nato già
Lo Rre d'ammore,
Che dà priezza e pace a ogne core.
Gloria a Dio, pace 'n terra,
Nu chiù guerra - è nato già
Nu chiù guerra - è nato già
Sbatteva 'o core 'n pietto
Sbatteva 'o core 'n pietto a ssi Pasture;
E ll'uno 'n faccia a ll'auto diceva:
Che tardammo? - Priesto, jammo,
Ca me sento scevolí
Pe lo golìo
Che tengo de vedé sso Ninno Dio.
Che tardammo? - Priesto, jammo,
Ca me sento scevolí
Ca me sento scevolí
Zompanno, comme 'a ciereve
Zompanno, comme 'a ciereve ferute,
Correttero 'i Pasture a la Capanna;
Là trovajeno a Maria
Co Giuseppe e a Gioja mia;
E 'n chillo Viso
Provajeno no muorzo e Paraviso.
Là trovajeno a Maria
Co Giuseppe e a Gioja mia;
Co Giuseppe e a Gioja mia;
Restajeno 'ncantate
Restajeno 'ncantate e boccapierte
Pe tanto tiempo senza dì parola;
Po jettanno – lacremanno
Nu suspiro pe sfocà,
Da dinto 'o core
Cacciajeno a migliara atte d'ammore.
Po jettanno – lacremanno
Nu suspiro pe sfocà,
Nu suspiro pe sfocà,
Co 'a scusa de donare
Co 'a scusa de donare li presiente
Se jetteno azzeccanno chiano chiano.
Ninno no li refiutaje,
Ll'azzettaje - comme a dì,
Ca lle mettette
Le mane 'n capo e li benedicette.
Ninno no li refiutaje,
Ll'azzettaje - comme a dì,
Ll'azzettaje - comme a dì.